زاوية خضراء. بقلم:داؤود ابوكلام داؤود .. البرهان عيون الجيش وتعب الشعب.
زاوية خضراء.
بقلم:داؤد ابوكلام داؤد.
البرهان عيون الجيش وتعب الشعب.
في خطاب رئيس مجلس السيادة /الفريق البرهان أمس بولاية نهر النيل بمنطقة البسابير بمناسبة الزواج الجماعي لأبناء المنطقة.. (ده في إطار زيادة التنمية البشرية وضرورة الإنتاج الإنساني). ولو لم تخني الذاكرة دي منطقة ناس زميلتنا الصحفية الاستاذة/حياة حميدة بت المك. وتحياتي لزوجها الصحفي حسن محمد صالح.. وهو رجل كردفاني شهم. في أكثر من مره قلت لكم في زاويتي الخضراء هذه. قلت لكم ان هذا البرهان (شفت وما داير اقول بن كلب) وقلت لكم عيونه مثل عيون حيوان (ابو دربان على وزن البرهان) فهو حيوان شرس ومحب لزوجته حتي الموت ويسوي لها الطريق داخل الغابة (قشه قشه). ولم اشم في حياتي رائحة اعفن من رائحة ابو دربان هذا.؟؟!! والعجب لو اخرج الهواء الساخن من بطنه؟؟. يبدو أن الفريق /البرهان بالأمس في نهر النيل اخرج كل هواء السياسية السودانية الراهنة الساخنه. (وكلم شامين رائحتها ). قال هناك بشائر لحل الأزمة السودانية الداخلية. وقال ما عندو شغل تحت الطاولة (هوووي يالبرهان للمره الألف انت جادي). قلت لي يا اسماعيل الشريف صاحب بلاغ وجدي صالح( وجدي عمل شنو..).. والبرهان قال هناك تنازلات تقدمت بها القوي السياسية (ديييل ناس منو دييل) مؤكدا ترحيبه بها. (شايفوا ما جاب سيرت المؤتمر الوطني). والله يستركم من صاحبكم سعادة حاكم دارفور (مني مناوي خشموا لفيف وبتاع فضائح). وقال سنسلك اي طريق (هووي يالبرهان اوعك من طريق فولكر والثلاثية.. مبارك اردول قال فولكر ده كضاب لم يجلس معه إلا ثلاثه بس). ما ظنيت طريق فولكر يخرج السودان الي بر الأمان.؟؟ البرهان قال القوات المسلحة من الأعلي حتي آخر جندي لن تتراجع وتتقهقر في حماية السودان؟؟ وقال ما ها نسمح بالانزلاق (كيف انزلاق اكتر من كده الناس انزلقت واتشلعت ذاتوا)؟؟!! . وقال هناك كضب وتلفيق ومزايدات قاعدة تطلع خاصة الايام دي (حمدوك جاي وشنو ما تعرف دي من عندي انا). وقال هناك تجريح لقيادات القوات المسلحة.. مثل الفريق /شمس الدين كباشي وياسر العطاء.. وبأن ةهناك خلافات بينه وحميدتي والدعم السريع قال ده كلو كلو كضب وتلفيق ومزايدات سياسية وقال كل القوات علي قلب رجل واحد (اريتوا قلبك يالبرهان). وقال هم متماسكين.. عموما نحن نتمني هذا التماسك للسودان. ويا سعادة البرهان أنت تعلم أن هناك تجدد للنزاع في النيل الأزرق محلية ود الماحي ولقاوة في غرب كردفان بين مكوناتها الاثنية والقتال الدائر هناك. أوقفوا هذه الشروخ والجروح. ونقول لحكومة جنوب السودان ولجناح عبد العزيز الحلو والفريق /حميدتي.. شكرا لكم. لفك أسري المسيرية. وعليكم أن تذكروا ان هناك أسري من الصيادين من شمال كردفان في جبل طاسي بجبال النوبه وهناك أسري من تيم التحصين بما فيهم نساء. لهم قرابة العام نأمل ونناشد للمرة الثانية والثالثة والرابعة.. . أن نراهم قريبا بين أهلهم وأسرهم. . عموما خطاب البرهان في نهر النيل فتح ضوء في نفق السياسية السودانية المظلم. وقد تعب الشعب السوداني تعبا شديدا في حياته المعيشية والتعليمية والأمنية والصحية ومعظم الناس راقده وعيانه وقاعده تطرش ما لاقية حق الحبوب ولا حتي عصير الليمون..يا سعادة البرهان الشعب راجيك ومنتظرك انا ما داير اقول ليك كضاب (لأن الرائد لا يكذب اهلة) شايف في ناس قاعدة تقول ابوكلام بتاع ثلج انا خلوني في ناس قاعدة تكسر حطب عديييل وانا خشمي وعندي.!!
المك/داؤد ابوكلام داؤد.. ١٥ أكتوبر ٢٠٢٢.السبت.
