الوجعلل .. د.عباس حديبة يكتب .. احلنا الحلا بله ،،،،،،،،،،

*الوجعلل-د.عباس حديبة يكتب-احلنا الحلا بله*
،،،،،،،،،،،،،،،،،،،،،،،
🖊️
؛؛؛؛؛؛؛؛؛؛؛؛؛؛؛؛؛؛؛
يحكي أن بله شخصيه معقدة التكوين ولديه مالديه من الغطرسه والفتووه..
يمتاز بله بقوة عضلاته المفتوله وشنب (كليقه) يعطنه عنوة في المريسه حتى يظهر بغير شكله المألوف. وصوته جهور وقليل الكلام.
يقطع الطرق على الماره ويقتلع كل مايعجبه من الناس عنوةً واقتدار.. وشكله مقبول نوعاً ما…
يفرتق حفلات الأعراس وفي المهرجانات دائماً فريقه الفائز في جر الحبل وخلافه من العاب القوى. وكلمته العوجاء مسموعه في أوساط قريته الوديعه.. سمساراً في كل شي عمولته بررا حاضره وبخيته حتى لو لم يحضر البيعه عودو راكب…
وفي نفس القريه هنالك شاب والده متعلم وشيخ كبير مرجعاً لأهل القريه والقرى المجاوره ووضعهم المادي جيد.. ترك له والده المرحوم ذخيره معرفيه في التنبؤات والحل والعقد و(الحنك) وهذا الشاب صاحب مشوره لأهل القريه والقرى المجاوره…
وفي يوم من الايام بينما يتصفح في مكتبة والِده وجد تنبؤاً ينبئ بأن الفقر سوف يحضر لقريتهم متلبساً شخصية احد المواطنيين ويرتدي جلباباً اسود خالٍ من أي نقود في جيوب جلابيته السوداء.
أخبر الشاب أهل المنطقه (القهرانين) با (الرصه) كلها.
…..
يقوموا أهل الحله اجتمعوا كويمات كويمات والكل يحكي مافعل به الفقر ويتوعده.. المهم الحاضر حدث الغائب..

ولقد حُدد يوم الاتنين دا اليوم الحا يجيهم فيه الفقُر وتمت الاستعدادات القصوى لمجابهته من سواطير وعكاكيز وسيطان وقنا اصم وسراويل طويله لسهولة المصارعات واعواد مختلفة المقاسات والاحجام..

ذهب الشاب المتنبئ لمنزل صديقه (بله الدقه الرقم جلا) الذي دوماً كان يحترمه ولم يتأذا أبداً من (بله) لأن الشاب مهذب لأبعد حد… وذلك لطلب بله معهم في معاونتهم لمجابهة الكاسر والاستفادة من قوة بله الجثمانيه و اللوجستيه.
ذهب له الي البيت وأخبرته والدة بله بأن بله (غائب) في سفره لكن حسب كلامو بجي يوم الاتنين.اووووو (امكم) امانه يا الفقر ماخشمك اترمد تب..
رجع الشاب صاحب التنبؤ إلى المنزل يحسب الوقت باالدقائق لقدوم اخونا بله..
حضر بله البلد ودلف بله على سوق الاتنين تبع منطقتهم فطر فوله مجنونه جن وضرب ليه كورة بوقنيه تمام وقال اشتري أغراضي… وكانت العربيه التي تقلهم إلى القري واحده… بس كان فاتتك الا تمشي كداري
زي عربات الأسواق زمان سوق الحديبه، يعقوب، ام شانق،عمارة البنا، تمبول، دوبا، الخ بتحوم على الحلال كلهن (ام دورور)
واشتري بله جلابيه من السوق جلابيه زرقاء جديده ريحة مكنة الخياط تقول واااغربتي…

قال إلا البسها في مناسبه جامعه ومعاها طاقيه حمره…
وصل بله الحله وشاف الجمهرة. وصل شغلاتو لغاية البيت. امو قالت ليه جاك ود شيخ احمد هنا سأل منك وقال قال قال..
خشا اتبرد ليه بمويه ولبس الجلابيه الما خمج الزرقاء الجديده
وعني ناس الحله على البحر دقررري..
وصل الناس قبل اسلم عليهم هجموا عليه با (القنا) كل السانات شايلين قنا..
ظهر الفقر في (هئيعت) بله..
وشروط التنبؤ إذا ظهر الفقر ادووه عشرة غطسات في البحر عشان ينظف ومئة سوط عنج اصلي ويقتص منه كل فقران على حد فقره…
بله قبل يصل اتشلبوه وهاك يا كؤوس وفوضى خلاقه وتظاهره عارمه والأولى من نوعها حتى القرى المجاوره شاركت مشكوره..
بعد الغطسات ظل يتوسل ويمسك زول زول…
تتذكر ياعثمان يوم لاقوك ناس الحله الفلانيه وقلعوا ساعتك وشلتها ليك منهم… تتذكر يوم بهائم الحله سرقن الفزعن منو ياناس.
تتذكري يا الساره يوم بيتكم قامت فيه النار مامشينا قطعنا (النال) من الخلاء.
تتذكر ياجلال لما طعنك الولد با البرجل منو الشاكلو ليك… تتذكر يا بابكر يوم ناس البنك عاوزين اسوقوك ما لبدتك منهم…
كل التوسلات لم تنجح بل ذادت لي بله الطين (بِلَه) وجاء دور تكملة التنبؤ باالجلد المئة سوط…
لكن وقف ابن الشيخ المهذب قائلاً يا اخوانا في التنبؤ يتم تفتيش الشخصيه اللابسا الفقر ما إذا كان في جيوبه عمله ولا مافي…
ضربوه ليك فتاشه الجلابيه ما جديده عليك أمان الله ولا (ابو النوم) مافيها باالمناسبه ابو النوم دا الخيط الداخل الجيب البمسك (النفو) الجلابيه لنج مالقو فيها عمله والجماعه في خلاف إختيار السوط البيوجع في الدق الخبراء ناس بطان سااااي…. إلا ربك رب الخير وبحركه (قرديه) يقوم الشاب المهذب يرمي في جيب بله عمله معدنيه لكي يكذب النبوؤه للناس…
ومن هنا جات احلنا الحله بله

احلكم الحله بله

قولوا آمييين

عباس حديبه