زاوية خضراء .. بقلم/داؤد ابوكلام داؤد : أحمد هارون.. وأسرار كردفان
(معاد كان بتاريخ ١١ أغسطس٢٠٢٣ )
كما ذكرت لكم في الزاوية السابقة عن القائد تلفون كوكو ابوجلحة وعن خواطرى فى فصل الخريف خاصة شهر أغسطس.. ( آب شهر الماء) تدفقت خواطرى. كما يتدفق ماء السماء في عينة الطرفة البكاية. وكما تدفق الأخبار والأحداث عن السودان والخرطوم وقفل طرقات ومداخل الأبيض من قبل الجنجويد. وأصبحت الشغل الشاغل لأهل كردفان وظل كثير من الناس في كردفان.. يرددون جهرا (بأن فى الليلة الظلماء يفتقد البدر) ويقولون يا حليل احمد هارون.؟؟!!! خازن أسرار نهضة كردفان. وللامانة والتاريخ داير اقول كلمات في حق الرجل في هذة الظروف ويعتقد بعض من الناس بأن بيني وبين هارون حرب ضروس خاصة فى جنوب كردفان بالعكس بيني وهارون اختلافات فى وجهات النظر احيانا وهو يعتقد بأنني حاد الطباع؟؟! وانا اعتقد بأنه ديكتاتوري في كثير من قراراته؟؟ وأحيانا يسند بعض الأعمال لهلافيت الرجال ؟؟!! . والمثل السوداني يقول (اخوك كن ما درتوا خاف فيهو الله).وهنا لابد من كلمات في حق هارون ونحن معشر الصحفيين لا نخاف في كلمة الحق لومة لائم.؟؟؟ كل همس الشوارع و طرقات الأبيض ابوقبه فحل الديوم وبلد جيش الهجانة ابوريش تقول.. ياحليلك يا هارون. وعن المشروعات التى توقفت؟؟ يا ترى ماذا اكتب عن هارون.. عن هارون الطفل في حي فلسطين و ود الياس (ضرب بالفاس ومريسة بالكأس)؟؟!! أحمد هارون الطالب في خورطقت والطالب في مصر؟ . أحمد هارون القاضي؟ احمد هارون العسكري.؟ احمد هارون ومحكمة الجنايات الدولية.؟ أحمد هارون السياسي؟ ام هارون مدير إدارة السلام.؟ أم هارون الوزير؟ ام هارون الوالي.؟ أم هارون المثير الخطير الشفت الزفت.؟ أم هارون الأسد الشجاع الذي لايهاب الموت.؟ أم هارون والعلاقات الاجتماعية الواسعة.؟ ام هارون الثائر والباحث عن ثأر اخية الشهيد الطيار القاسم.؟ أم هارون (موية.. طريق.. مستشفى) وأفعال جماهير كردفان مع النفره.؟ أم هارون (وسروال النساء ههههه).؟؟ أم هارون المستقبل.. (والذي ظهر اليوم قائدا للمؤتمر الوطني في هذا الظرف الذي يمر به السودان وسط أمواج الحرب الجارية مع الجنجويد
(إنه هارون
اخي هو أفصح مني لسانا).؟ الحديث عن أحمد هارون ذو شجون يحتاج صفحات وصفحات.. مره وانا في البلد قاعد تحت الراكوبه مع والدي والكلام جاب الكلام. قال لي والد احمد هارون اشتغل معنا في الجلوجيا وحفر معنا بئر جدك المك داؤد وزبحنا غنمايتي السوداء كرامة.؟؟ وكان عندما يمسك البكارة عندو جلالات وأغاني مضحكة وحماسية.؟ وقال انا لما غادرت الشغل جبته في مكاني خالك فضل مقدوم وصارو أصدقاء مع محمد هارون وحكي لي عنه خالي فضل وعن ذكرياتهم في الأبيض ودار الريح.؟ وكمان واحد من اخواني قال لي انت عارف احمد الشين الوالي اخو دفعتنا سليمان الشين الوالي متزوج شقيقة احمد هارون وهارون كان بجي الجبال الستة وعنده نبلة جنو يطار الطيور.. (تااااري يا مولانا انت بتاع طيور هههه). الرجل هارون عنده طاقة جباره وقدرات وزكاء وخطاط وكتاب ورجل نزيه ما تقول لي (بصمة عيون وكلام فارغ ). هارون لما كان واليا في كادقلي كان نائبه عبدالعزيز الحلو يعني حركة شعبية ومؤتمر وطني وهناك (أسرار وأسرار بينهم). كانوا أصدقاء وفرد وقال مافي زول يخش بين البيضة وقشرتها.؟؟ وانا كمان قمته دورت شغل بين النوبا هنا والنوبا هناك؟؟ وهو عارف وما قدر يسألني قلت كن اسمه هارون خلي يسألني..؟؟ . عشان نوريهوا كيف (يسلق البيض) طبعا هارون باني بيت مع صحبه الحلو في كاودة.. يوم في كاوده صلينا الجمعة تحت شجرة المانجو مكان المسجد الحالي ولقيت نفسي وجها لوجه مع احمد هارون سلمنا لبعضنا وفرينا على كده. وأي واحد فينا خلي الموضوع في حنانوا..؟؟ والأخطر من ده كلوا يوم استفتاء انفصال جنوب السودان وداخل مطار جوبا شايف ليك احمد هارون واقف مع صلاح قوش وكلام دقاق وأحمد هارون مديني ضهرو (ابليس قال لي امشي يا ابوكلام ادي هارون ده قرصه. عشان يعرف الله واحد تاني قلت انا مالي ومال الشبك) انا في مهمة صحفية. وعند تأسيس إمارة الجبال الستة اختلفنا في وجهات النظر بخصوص فصل إمارة الاجنق الكبري انا وجه نظري عدم فصلها. وهو قام فصلها على اثنين. وركب طائرة هليكوبتر ومشي نصب الأمير /عبدالله صابون. بكرتالا أميرا للجبال السته. له الرحمة والمغغرة . وخلاني قاعد في كادقلي وما اشتغل بي وهو رجل قانوني وقال الديمقراطية فازت علينا انا والمك قادربية.. وبرضوا زعلت منه في حرب ٦/٦/٢٠١١.اولادي حصل لهم حادث واتكسرت زوجتي في يدها وبنتي في الحوض وابني بجروح شديده في الوجه ما قال لي كفاره رغم أنني اعمل معه فى مكتب واحد.؟؟ .. لزوم الكلام ده كلوا داير اقول اننا نعرف هارون جيدا ونحبه رغم اختلاف وجهات النظر احيانا (وهو لا يفسد للود قضيه) وهارون حساده واعداءه كثر. كان آخر مناصبه نائب رئيس للمؤتمر الوطني… وريئسا وناطقا رسميا للسجناء بكوبر. وكلكم سمع خطابة عشية خروجهم من السجن إبان أحداث ١٥ أبريل ٢٠٢٣. وحديث حميدتي وقوله بأن وراء هذه الحرب احمد هارون وكرتي وأسامة عبدالله. وكلنا يعلم خلافاته مع حميدتي وكيف أصلح بينهم الرئيس البشير وقتها. وهارون بعبع مخيف في الساحة السياسية السودانية. ودائما ما يفكر خارج الصندوق.؟؟!! . وشايفين قالوا ظهر هنا وهنا وهناك كأنه عنده طاقية الاخفاء ممكن يكون جمبك ويكديك كف طااااااخ؟؟ . وما تشوفوا حتى هنا نقول لمولانا/ احمد هارون رايك شنو في سفت خالد سلك.؟؟!!
عموما اعدنا العمود بعد ظهر اليوم احمدهارون قائدا للمؤتمر الوطني
وسط عواصف مختلفة حول قانونية وشرعية تكليفه لكن في تقديري هارون اهل لها وزيادة وبيننا وبينكم الأيام سننظر ونري
المك /داؤد ابوكلام داؤد. . ١١ اغسطس ٢٠٢٣.الجمعة.
