زاوية خضراء .. بقلم: داؤد ابوكلام داؤد : العسل خلاصة الثمرات.!؟

كما وعدناكم في الزاوية الماضيه ( مساكن النمل وطائر الهدهد ) بإننا سنواصل في تأملات آيات القرآن. هذة المرة توقفنا وتأملنا سورة النحل الآيات (٦٨-٦٩-٧٠) قال تعالي (وأوحي ربك الي النحل أن أتخذي من الجبال بيوتاً ومن الشجر وممايعرشون. ) ياسلاااام إنه الوحي الرباني وهو القادر أن يجعل العسل يجري أنهاراً في الجنة يا سلاااام ما أحلاك يا عسل. ؟؟ طبعاً قالوا معظم الشعب السوداني عيونه عسلية؟؟ وبعض العيون سكرانه بلا شك.؟؟؟ الفنان الراحل عبدالعزير المبارك صاحب الصوت العسل قال( عيون كاتلانا إلفة يا عسل رايق مصفي). هذة الأيام في عدد من ولايات السودان في ناس عيونهم ورمانه كارلوس وعامله مسيرات ؟؟ طبعاً النحل عنده أوامر ربانية بالتحرك ذيوا وذي الجيش. ؟؟؟ وهو أن تتخذ من الجبال بيوتاً ممكن يكون جبل سركاب بكرري في أم درمان. ؟ اوجبل حيدوب بالنهود بغرب كردفان أو جبل عيسي بشمال كردفان أو حتي جبل الدائر. ؟؟ أو جبل مرة في دارفور ( وسلاااام علي الفاشر وأهل الفاشر وثبات الفاشر ). أو حتى جبل دود وجبل موية وجبل أولياء أو أن تتخذ من كل جبال النوبا بيوتا بما فيهم جبل الفيقر بالدبيبات ؟؟؟ وممكن للنحل حسب الأوامر أن يتخذ من شجر غابات الدندر بيوتاً رغم وجود الحيوانات.؟؟!!! أو يتخذ من شجر غابات السنط بالخرطوم وما جاورها من جنائن المقرن وتوتي؟؟؟ أو أي شجرة قدام البيوت؟؟ النحل عنده أوامر إذا عارضته ممكن يعضيك أو حتي يقتلك. ؟؟ واقول ليك حاجة اي بت اسمها نحلة تكون عضاضه خلي بالك من نفسك . ؟؟ وأكيييد عبر النحل ليس كأبرة البرهان في الحفر ؟؟ عبر النحل شفاء رغم آلامها وسخانتها؟ ذات مرة وأنا جالس في اجتماع بالبلد تحت شجرة اللعلوب وكنت شاعر بألم في صدري ووضعت أصبعي في موضع الألم (أنت تبري من الألم). وقلت في نفسي ياريت تعضيني نحلة هنا.. هنا..هنا..وما هي إلا لحظات جات نحلة طائرة من وين ما عارف. ؟؟؟ وغرست أبرتها في موضع الألم وواصلت في طيرانها ورحلتها سبحان الله .؟؟؟ ههههه سامعك؟؟؟ ولو قلت للبت يا عسل تعال شوف التبسم طوالي تفكر في الزواج وشهر العسل.؟؟ يا رجال السودان يا بخلاء قولوا لنساءكم وزوجاتكم يا حلوات يا عسلات .؟؟ وخلو بالكم من عسل الجركانات والناس اللافة في الأسواق كله سكر محروق؟؟ لا فرق بينهما (وبنات الكريمات ) تزوير في تزوير الله يكون في عون الشباب؟؟؟ وتستمر الأوامر الربانية للنحل (ثم كلي من كل الثمرات فأسلكي سبل ربك ذللاً يخرج من بطونها شراب مختلف ألوانه فيه شفاء للناس إن في ذلك لايةً لقوم يتفكرون ) كل الثمرات اللعلوب والحنظل والملوته والتفاح والبرتقال وشجر السدر والطلح وديل من أجود أنواع العسل ؟؟؟ مثل ما (السمن خلاصة اللبن) وبالتأكيد خلاصة حرب السودان رغم الدمار والخراب والنزوح والهجرة والجوع والمرض والموت ستكون عبره وعظه لأهل السودان(لعلهم يتفكرون). ودي آية من آيات الله عرفنا صديقنا من عدونا وحبيبنا من خصيمنا لان بعض الناس منا أفتري وتكبر وتجبر وإزدري ولا ينظر للذين من حوله من الأهل والفقراء والمساكين ( ويا دنيا ما فيك الإ أنا ) . ولكن هسي بعد عمايل (النحل الجنجويدي والشفشفة وخراب ونهب الديار ). تاني ما أظن في زول يقول أنا ود القبائل ومن أعز الناس وبقية الناس (عبيد وأنجاس مناكيد ).(والله خلقكم ثم يتوفاكم ومنكم من يرد إلي أرزل العمر لكي لا يعلم بعد علم شيئاً إن الله عليم قدير )

المك/داؤد ابوكلام داؤد. مدير مركز عيون التلال الاعلامي الجمعة ٢٠سبتمبر ٢٠٢٤