القحاطة يحتلون سفارة السودان في ايرلندا .. حسام الدين أبو العزائم

عودة لموضوع سفارتنا في ايرلندا.. إلى السفير محمد موسى القائم بأعمال سفارة دبلن بالإنابة ووزارة الخارجية السودانية: تساؤل ما الذي يحدث عندكم ولا اقصد ما نفته الخارجية فيما يخص ما رشح عن شبهات فساد حول السفير، ولكن..!؟
هاكم التالي:
– ما هو سبب وسر مخاطبة السفارة في دبلن لمواطنينا تخصيصا بـ الجالية دون تعميم التسمية بـ المقيمين، وجميع اخواننا هناك يعلمون تماما أن اللجنة التنفيذية للجالية يسيطر عليها القحاتة وتترأسها المدعوة خديجة فرح وهي إحدى كوادر المؤتمر السوداني.
– يا خارجية ويا السفير محمد موسى أنا البعيد أعرف أن رئيسة الجالية تعمل مترجمة معتمدة لمكتب طالبى اللجوء، وبالتالي تربط السنبلة خديجة علاقة وثيقة وممتازة جدا جدا مع عدد من ضباط ميليشيا الجنجويد الموجودين فى مكاتب الهجرة الغير شرعية.
– اديكم زيت تاني يا خارجية ويا السفير موسى، تبقى مشكلة إذا عندكم علم زي ما عندي علم، إنه مكتب الجالية السودانية في ايرلندا الانتوا خاطبتوه معظم المسؤولين فيه برضو سنابل وكوادر في المؤتمر السوداني، وهم مجدى وباسل ومعاهم ملكة.
كلهم كوادر مؤتمر السوداني مسؤلين من مكتب الجالية بأيرلندا
– طيب انتوا اكيد طبعا عارفين سبب المشكلة الاتسببت فيها (#خديجة_ايرلندا) قبل 3 سنوات ومنها قدم أعضاء الجالية الشرفاء استقالتهم لتصفى الكراسي لشلة قحط والنطيحة والمتردية واستفردوا بيها منتصرين.
– أكيد برضو عارفين يا خارجية ويا سفيرنا بالإنابة في ايرلندا سبب استقالة أعضاء باللجنة التنفيذية للجالية شنو؟ عشان اذا ناسين أذكركم، وجدوا السيدة رئيسة اللجنة داخل مقر السفارة السودانية في دبلن وهي بتقوم بحصر السودانيين المقيمين في ايرلندا المناهضين لـ حكومة قحط حمدوك باعتبارهم أعداء لما تسمى ثورة ديسمبر، كلام لا يقبله العقل، حصر أسماء أي سوداني/ة عنده رأي في قحط، ووضعه في خانة العدو، حصل قابلتكم كراهية للدرجة دي، والحصر ده اتزامن مع زيارة بعثة الجوازات والسجل المدني، يعني منع المقيمين من أبناء وبنات بلدهم من الحق في استخراج أو تجديد جوازات السفر أو استخراج شهادات ميلاد لعيالهم، في الوقت الاتاحت لجنة خديجة ايرلندا (فورم) لكل متحزبي ومنسوبي قحط لتلقى خدمات البعثة وما أعلنت بقية المقيمين بمواعيد عمل البعثة عشان هم ما قحاطة، بالله تبقى مصيبة إذا ما عندكم علم يا خارجية ويا سفيرنا بالإنابة المحترم محمد موسى!!
المهم .. يا وزارة الخارجية ويا قائم بالأعمال محمد موسى عشان ما تقولوا ما (وريييتكم) لا زال القحاطة يحتلون ويحكمون سفارة السودان في ايرلندا.