قلم .. ودانة .. بكري ابو رنات

*

*التفاوض كلمة قحتاوية اريد بها تدنيث القضية*
*لا للحرب كلمة حق اريد بها باطل طالعة من غرف الجنجوقحتية اريد بها العودة للدولة السودانية*
الشعب السوداني دائما متسامح ويدعم كل خطوط وفاقية تاتي له بسلام يحقن دمائه وعندما ذهبت حكومة البشير الي منابر التفاوض مع الحركة الشعبية وجدت تفاعلا كبيرا ودعما من الشعب السوداني وايضا عندما ذهبت مع حركات دارفور في عدد من منابر التفاوض خارج السودان كان الشعب داعم لهذا الخط من اجل تحقيق سلام يرضي الجميع وبعد ذهاب حكومة البشير وذهبت حكومة حمدوك الي جوبا ايضا الشعب تفاءل بهذة الخطوة ودعمها وفرح بها واحتفل بعودة قادة فصائل الحركات المتمردة …
اما الان كلمة تفاوض كلمة استعمارية الهدف منها تقسيم الدولة السودانية وعودة اصحاب الجوازات الأجنبية للسلطة واعادة الروح في جسد قوات الدعم السريع المتمردة واعادتها مرة اخري لتكتم علي انفاس الشعب السوداني …
فاليعلم الجميع ان التفاوض حق من حقوق الشعب السوداني هو الخاسر الوحيد في هذة الحرب لايستطيع كائن من كان ان يفرض علي الشعب السوداني راي او قرار او مجموعة انتهازية تريد بيع القضية وتقسيم البلاد الي دويلات سودانية….
والتفاوض الان قرار شعبي وليس،قرار فرد او جهة معينة ..والبرهان الان يرأس حكومة مؤقتة ليس لها الحق في اي اتخاذ قرار مستقبلي ومصيري للشعب السوداني والدولة بل هو البرهان نفسة يلقي حتي نتائج التفاوضات الاخيرة ..وايضا هو القائد الأعلى لقوات المسلحة وهي منوط بها حماية الشعب السوداني والدولة السودانية من التدخلات الخارجية التي تريد استعمار البلاد ولكن عن طريق التفاوض لانها فشلت في الاستعمار بقوة السلاح….

وماف شي اسمه الهجوم حق الجنجويد وقف علي المناطق بي سبب مفاوضات جنيف ما تسمع كلام القحاته دا اسمه الصيد في المياة العكرة
قالوا الهجوم علي الفاشر والتدوين وقف
تدوين يجي من وين والمشتركة طلعت ليهم في حواضنهم قاعدة تدحر فيهم
قالوا محاور الخرطوم ومدني هادئة
منو قال ليك كده ؟!! اسال لو عندك زول في بحري ولا الخرطوم ولا مدني من اعداد الجنجويد ديل ح يقول ليك كلام يصدمك الناس دي الفات رجع الغرب هارب والفات فزع لي مناطق تانية واليومين الجايات ح تسمع بي تقدم لي الجيش في محاور جديدة
وح تسمع بي غارات جوية علي مناطق كتيرة وح تسمع بي هجوم علي سنار لانهم قاعدين يحشدوا ما تبقى من قواتهم
دي ما شغلة تفاوض
جنيف مؤتمر لي مناقشة المساعدات الإنسانية ما لي وقف الحرب ولا المفاوضين الفيهو مؤهلين انهم يتفاوضوا لي وقف الحرب
الهدوء دا بي فضل ربنا واستنزاف الجيش للمليشيا وتضحياتهم ما بي سبب مؤتمر جنيف ولا بي سبب شعارات قحت المضللة دي حقت لا للحرب …ولا للحرب دي كلمة قال الشعب السوداني برمته عندما كانت تنادي قحت بها يالاطارئ يالحرب…
الان الوضع تغير والموازين والحسابات الدولية تغيرت وايضا الشعارات تغيرت وبقت
لا للتفاوض
ونعم للحرب
نعم لا للتفاوض ياتي بالجنويد والقحاتة الي المعادلة السياسية القادمة ولا للتفاوض ياتي لنا بالاستعمار الخارجي …
ونعم للحرب تقضي علي الجنجويد الملاقيط اشتات غرب افريقيا ونعم للحرب تقضي علي الخيانة والعمالة التي اضرت بنا واخرت الدولة السودانية وشردت الشعب السوداني ونعم للحرب المنتصر فيها باذن الله الشعب السوداني وقواته المسلحة الباسلة وشبابه الوطنين الاخيار الذي قدموا ارواحهم في سبيل الله والوطن وان ينعم المواطن السوداني بحياة كريمة تليق بعظمة الانسان والشعب السوداني …

*الله أكبر علي كل ظالم*
*والله اكبر علي كل معتدي*
*والله والخزي والعار علي الخونة الاشرار*
*حفظ الله السودان وشعبه من كل مكروه ونصر الله بقوتة وجبروتة قواتنا المسلحة وجميع المرابطين معها في كل مكان*

*🖋️بكري خضر محمد عثمان ابورنات*