زاوية خضراء .. بقلم داؤد ابوكلام داؤد : للأهل البقارة والحوازمة والعطاوة
الزول مرات بسأل نفسه في ساعات صفاء وساعة إيمان والرجوع لكلام الله بعيداً من صراعات وخلافات وسياسات الدنيا الفانية (الدنيا ام قدود ). وحتي لو الواحد فينا مات غداً ووقف أمام الله يقول يارب انا بصفتي مك وعمدة إدارة أهلية قدمت النصيحة للأهل بكردفان نوبا وعرب عموما هذة خواطر حول اهلنا البقارة والحوازمة والعطاوة كيف كنا ؟؟؟ وكيف صرنا.؟!!. ويا بقارة ويا حوازمة لو معارفين الحقيقة دي حقوا تمسمعوها مني كل القبائل في كردفان كرهتكم وشمتكم ولا تتمني حتي جواركم في السكن ؟؟ لعمايل اولادكم في مليشيا الدعم السريع من قتل ونهب واغتصاب وارهاب للمسافرين في كل الطرقات. ؟؟؟ صورة البقارة في الماضي وهم راحلين الي المخارف في كردفان كان عنوان البشري والفرح والسرور والخير والسمن وحتي العسل واللبن والروب واللحم..!!! كيف ينسي الناس دورهم في كازقيل واسواق الاجبان والمش أيام الخواجة (بنيتوتي). ومناظر السعية والبهائم والفرقان والمسير وموارد المياة وكيف يكون منظرهم ونسائهم علي ظهور الجمال وبعضهن علي الثيران والبعض الآخر علي ظهور الحمير والبعض الاخري ماشي كداري يقارع البهائم حتي لا تدخل المزارع الواقعه في طريق المرحال. وتسمع أصوات النقارة وصوت الابقار والعجال والغنم والضأن وصوت الجداد. ونبيح الكلاب ؟؟ وكيف أنهم بعد أن ينزلوا في منازلهم يعودون الي القري والحلال لبيع اللبن والسمن والروب والجداد وبعض ما عندهم من دليب وهالوق حاجات الصعيد؟؟ وبالمقابل يبدلون الروب بالذرة والويكة والدخن وبعض حاجات ناس البلد. وتحصل مناسبات وأفراح وأعراس ويلعبون المردوم والكرنق ويتصارع فرسان النوبا والبقارة طوال النهار وسط الفرح والزغاريد ثم ينفض السامر والكل يعود حيث كان واحياناً بيحصل ( الحب والغرام ) . غايتوا النوبا والبقارة ( مابدورك وما بحمل براااك ). وكلهم في مخارف كردفان اصدقاء وأخوان في شيكان وكازقيل وأم هيف والشقف والبركة والدبيبات حتي مشارف الأبيض ثم يعودون سوياً الي الصعيد نهاية موسم الخريف. ومعظم قيادات وابناء جنوب كردفان درسوا سويا وكانوا اصدقاء ما خلوا قرية ولافريق الا زاروا الاهل فيها لكن السياسة بت الكلب فرقت بينهم وشتت شملهم (حركة شعبية ومليشيا دعم سريع وحزب أمة وكيزان وفلوف ). علماً بأنكم يا بقارة ويا حوازمة أكبر فلول الإنقاذ بالدفاع الشعبي وقوات المراحيل وحرس الحدود ؟؟!! وكان في الماضي بجبال النوبا اغلب سلاح العرب البقارة الحراب والعصا والسكين والنوبا كان عندهم كل انواع السلاح الناري المعروف في الزمن داك. ورغم ذلك لم يتعدي النوبا علي اعراض واموال البقارة ولم ينهبوا ابقارهم عموما الكلام ذو شجون في هذا الصدد ومساحة الزاوية لا تكفي داير اقول وباختصار وفي إشارات للأهل جمعياً في كردفان للخروج الي بر السلام والتعايش السلمي وهذه مسئولية تقع علي عاتقنا نحن رجال وقيادات الإداره الأهلية نظار ومكوك وعمد وشيوخ ( رغم أن هناك بعض المعرصيين وعديمي الأصل عندهم رأي في الإدارة الاهلية ) .وأنا أصالتاً عن نفسي وبالإنه عن بعضهم وليس كلهم داير أقول للأهل النوبا والبقارة (يجب أن نبتعد من الاستقطاب السياسي كقبائل) وبصراحه ما يجري عندنا هو الفعل ورد الفعل من الحركة الشعبية ومليشا الدعم السريع.؟؟!! واقول لأهلنا البقارة والحوازمة مافي زول بقبلكم وبعرفكم اكتر من النوبا في الدنيا دي ولا يغرنكم سلاح وأموال مليشا الدعم السريع وعربان الشتات وأولاد الجنيد والعطاوة الدارفورية و لو كنتم تظنون بأنكم ستهزمون كل قبائل كردفان بقوة سلاحكم وارهابكم ونهبكم واغتصابكم وقطعكم طرقات المسافرين تحت ظل محاربة دولة ٥٦ وفلول الكيزان خليكم في ركوب رأسكم هذا..؟؟ هنا كل الناس في كردفان ضدكم ومع القوات المسلحة حامي حمي السودان. ؟؟ عموما يا بقارة ويا حوازمة ويا عطاوة نحن قلنا الفي ضميرنا ليس خوفاُ منكم لكن احتراماً للذي بيننا منذ عهد الجدود من تحالفات واحترام متبادل لكن (انتم لا تتحملون البدن لقيتوا السلاح والمال وعاملين فيها خمسة بقرش مثل العجل الشبعان لبن تنططوا جاي وجاي وخليتوا اولادكم الصغار بجلبوا للناس بالسلاح في الشوارع ) ولو قلتوا ( كووو) الا الدواس بس ونهب وقفل الطرقات واكل أموال الناس بكردفان انتو حرين شيلوا شيلتكم من غضب شعب كردفان والسودان وغضب القوات المسلحة وغضب الله يوم القيامة. ؟؟؟ الرحمة والمغفرة للاخ/حمدان علي البولاد وللابن سليمان سند سليمان الشين والتعازي للاخ الامير/ سند سليمان وكل آل الشين وآل توبين.. ولعموم الحوازمة بكردفان.
المك/داؤد ابوكلام داؤد. مدير عيون التلال الاعلامي ٢١ مايو ٢٠٣٤
