زاوية خضراء .. بقلم: داؤد ابوكلام داؤد .. الهجانة الساس يا بهجة السودان

الهجانة سفينة الصحراء ( أفلا ينظرون الي الأبل كيف خلقت ). الهجانة حكايات من الجسارة والرجالة هم الصناديد بكر القوات المسلحة السودانية.. زارني في منزلي أيام عيد الفطر المبارك بن خالتي آدم نمر شميلة والد الاستاذ/موسي ادم نمر شميلة بالإذاعة السودانية مبروك عودة صوت السودان (هنا ام درمان ) ومن خلال المعايدة الكلام جاب الكلام وكانت قصة الهجانة وهو طبعا نزل عريف بعد خدمة تسعة وعشرون عاماً بالسلاح الطبي بالهجانة (عينة دكتور/عمسيب). قال لي وأنا عمري ما بين ( ٨-٩ ) سنوات وكنت سارح بالغنم في الكافير بالجبال الستة. وكان الزمن داااك المشي كداري الي الأبيض (ثلاثة أيام فترة الطريق ) ومرقنا أنا والمرحوم ادريس الدود وأبوي نمر شميلة اليوم الأول بتنا في (دبيكر) بالقوز. واليوم الثاني في (التميت). واليوم الثالث حوالي (كازقيل ). ولما وصلنا (التبلديات اي شجر التبلدي). جنوب الأبيض بعد البان الجديد شمالاً وكان من عادات أهلنا في الكافير والجبال الستة نغني ونرقص ونفرح ثم ندخل الأبيض ونحن في قمة السعادة والفرح لأنها بلد(الشل.المك كرتو فن ). قام ابوي نمر شميلة شال لينا الغناء الثراثي بتاع الجدود (انا وادريس الدود رقصنا كرنق جنس رقيص لمن عرقنا صبب). هههه انا ذاتي قربت أضع القلم واقوووم أرقص كرنق لو لا جواسيس المنزل يقولوا أبونا المك بقي مجنون.؟؟ قال لي بعد داااك دخلنا الأبيض(هسي اي زول زهجان قرفان جاي داخل الأبيض شايل قوقوا ؟؟؟ واسمها بره اي بارا القوز الأحمر). ومشينا بيت ناس خالك التوم نورين بحي القبة ده والد الضابط بالشرطة الآن /الجيلي التوم نورين بالرديف. وجد الموظف ببنك الخرطوم. عمر أزرق موسي. وبعد كم يوم مشينا لعمي آدم شميلة كان عسكري وسائق بالنقل الميكانيكي هو وعمنا الأمين باجا. و عمنا الدود صلاح..وأبوي اصلاً كان جايبني عشان نشيل بت عمي المولودة الجديدة (فطينة ) وكان اشلاق العساكر عبارة قطاطي. المهم استمرت الحكاية وفكرته امشي اقرأ في الخلوة في بوابة الأشغال وفي النهاية لما ما لقيت طريقه زعلته ومشيت من عمي بيني وبينكم هو ما داير يقول لي ( البنات الصغار ديييل بكااايات وبولاااات ولما الواحدة تكبر تعال شووف يا دنيا مافيك الا أنا غايتوا خشمي وعندي..!!!) عموما ادم نمر شميلة كأنه اذاعة(BBC ) لا تكل ولا تمل. قال لي يا حليل الهجانة كان هناك طابور شرف يوم خمسة في الشهر مرات بصادف يوم الاثنين دائماً تلف المدينة تبدأ من القيادة ثم مروراُ بالمستشفي(قف) طواالي جامع (كرشولي ). وشارع الدكاترة حتي نقطة البوليس(قف) طواالي ابوشراء ثم المقابر ثم شارع مستشفي الشرطة والبيطري ووراء الاستاد وشارع الاذاعة. ثم بوابة الأشغال ثم نادي الجنود(قف). ثم نخش الميدان ويجي اللواء ويأخذ التحية ثم تنصرف كل وحدة. وكان يوم فرح لكل مدينة الأبيض زغاريد وحماس فوووق للسماء وبالامس الاحد الحادي والعشرون من أبريل ٢٠٢٤.كان النصر للهجانة ساس الجيش وكل المنظومة الأمنية بشمال كردفان وأمتزج الماضي بالحاضر نفس الحماس والفرح والزغاريد والحلوي والعصائر حتي السجائر أنفعل تاجر من تجار الطبالي بالقرب من السكة حديد وقام وزع ( ٤ باكوا سجائر ) للعساكر والجنود الا نزل الرائد/مؤتمن ادم عمران. ومش قال له خلاص..خلاص..يا زوول كده تقطع راس مالك. ياسلااام عليك ياشعب يا سوداني وهل هناك رأس مال أكثر من وطننا السودان وبلدنا كردفان !!؟؟ سلاااام علي شعب وجماهير الأبيض التي ظلت تكبر وتهلل وتزغرد وتروري وتجوب المدينة خلف جنود الهجانة من اقصاها لاقصاها حتي دخل العساكر ثكناتهم سلاااام علي الوالي/عبدالخالق عبدالطيف وهو في الخطوط الامامية لا يهاب الموت والرصاص وهكذا القائد (لكن بيني وبينكم يا لجنة امن شمال كردفان ده رأس وساس الولاية لو غلبكم اربطوا بالحبل عشان ما يلخمكم بتأمينه ههههه ).سلااااام الي قائد الهجانة اللواء/فيصل محمد الحسن وعلي قائد الأمن الاستخبارات (الجن الاسمو العميد العوض ) وسلام علي قائد الشرطة العالم الدكتور اللواء/عبدالله عبدالرحمن سلاااام ( اللواء جنجا .. احمد الفكي الزين قائد الاسناد والمستفرين ومعه العقيد/الطيب احمد البشير قائد الاحتياطي ) تعظيم سلام للقيادة والضباط والصف والجنود والمستنفرين وشعب كردفان سلاااام علي الصابرين في جبل الدائر سوف تدور الدوائر بدعوات الارامل واليتامي والثكالي والنازخين علي المليشيا المتمرده القاتله المغتصبة عبركم تقبل الله الشهداء وشفاء عاجل للجرحي كل امنياتنا مع نزول الخريف تنزل كلاشات ودوشكات من السماء ذي المطر لكل مواطن من مواطن كردفان واليوم داااك الله قال بقولكم من غضب الشعب السوداني الهجانة فوووق جيش واحد شعب واحد.

المك/داؤد ابوكلام داؤد. مدير عيون التلال الاعلامي. الاثنين ٢٢ بريل٢٠٢٤.