زاوية خضراء .. بقلم:داؤد ابوكلام داؤد .. البرهان وقائد الجزيرة( احمد محتمة)

والله يا جماعة مواهب الانسان القيادية دي بتظهر منذ الصغر ومن زمن الصبا الباكر. وقالوا (الخريف اللين من رشاشوا بين). في الوقت داك أوائل ثمانينيات القرن الماضي.وانا جاي كرت كرتونة من البلد (الجبال الستة).

ونزلت مع جدي المرحوم/كوكو ضحية رمضان بام درمان بيتهم لا تعرفوا واقع في الهاشماب ولا في العباسية ولا في الموردة ولا حي الأمراء .وهو جوار المجلس البريطاني .وجنوب المجلس البلدي وغرب بيت ناس ابو العلا. دار حزب الأمة حاليا . ومن خلال الاندماج مع اولاد الحلة تعرفت علي أحمد (محتمة). وهو جارنا وكان محمد احمد وإخوانه مالك ومصطفي اولاد جدي كوكو ومعظم اولاد الحي بدرسوا في مدرسة الموردة الابتدائية. ومن طرائف مدرسة الموردة. محمد احمد وعبيرو اخو حنان بلوبلو الوحيد. كانوا غائبين فترة من المدرسة وكلهم طوااال ومن قراقير الموردة. ( ولا مش كده يامكي المغربي الولد المدلل). دخلوا علي مدير المدرسة بكل هرجله. وقالوا له (اوووعك ..اروو رووك دايرين نقرأ..).المدير عين ليهم كده.. وقال لهم (اووووك اروو. روووك مافي قرايا ههههه) اما صاحبنا سعادة اللواء/احمد عمر الطيب قائد الفرقة الاولي مدني بولاية الجزيرة الحالي وهو في مدرسة الموردة كان هناك مسرحية مثل فيها هو دور القاضي. وجلس علي الكرسي وعامل فيها قاضي صارم وناشف وشال الشاكوش ضرب علي التربيزة وقال(محتمة)..وكان عنده لجنه في لسانوا. طبعا داير يقول(محكمة ) وماتت مدرسة الموردة من الضحك ومن يومها لصق لنفسوا لغب(محتمة) .واحمد محتمة أصبح من أقرب أصدقائي. والتقينا في مدرسة الاميرية المتوسطة هو كان قدامي بفصل حتي عندما دخل الكلية الحربية كان الدفعة علي ما اظن (٤٠) وانا قدمت في الدفعة (٤١) وعند مقابلة القائد في القيادة العامة رجعت من البوابة ولم اقابله (يا جيش الله ريحكم من انقلابي ههه ) ومعي بدران محمد عبدالله ومحتفظ بالاورنيك وصورة البوستال حتي اليوم لأنني كنت اعاني من(كسر في فخذ الرجل الايمن ). نرجع شويه واحمد (محتمة) من الاميرية المتوسطة مشي المؤتمر الثانوية كل مراحل دراسته من الابتدائي لم تخرج من شارع الموردة حتي بيتهم في شارع الموردة وعملنا سويا في غسيل العربات في دار رياضة ام درمان بشارع الموردة وبعدها نمشي ناكل البوش في دكان عمنا البازار والد مهدي وأمير بشارع الموردة ولعبنا الكورة بميدان الجزائر شمال مدرسة الدايات للقابلات. والراهبات الخواجيات الحلوات. وكمان عندك عمليه سودة مابين استديو كوش ودار حزب الأمة. ما (بكتبها ما تخاف هههههه ) وبعدها مشي كلية الهندسة عطبرة وسبحان الله كل إخوانه أطباء الا هو حتي ابناءه الان في مجال الطب.

طبعا احمد ده الوحيد المهرجل في البيت كان اخوه الاكبر الشهيد/محمد عمر الطيب
بسوقنا انا واحمد نمشي كداري ونقطع كبري شمبات عشان نصلي قيام الليل في العشرة الأواخر من رمضان في مسجد أبوبكر الصديق بشمبات شرق المظلات.يا سلام كان عندهم أرز بلبن في السحور حلو جنس حلا.

عموما احمد ده اكتر زول بشبه البرهان بس (محتمه) عيونوا كبار شويه..والبرهان كما ذكرت لكم أكثر من مره في زاويتي الخضراء . عيونوا تشبه عيون (حيوان ابو دربان عفن الرائحة شديد الدواس ). البرهان التقيته في غرب الجنيه منطقة كنقوا حرازا وكان برتبة (النقيب ١٩٩٠). اما.(محتمه) التقيته بعد تخرجه برتبة الملازم بالمدفعيه عطبرة. سنة ١٩٩٢.في رمضان وانا في طريقي الي مصر ومن ثم السعودية وبريطانيا ولكني فشلت في الذهاب لبريطانيا اتصلت عليهو من محطة القطار قال لي انا في نادي الضباط تعال لي هناك. .قلت له القطر ماشي طوالي قال لي لا.. لا..القطر بتأخر شديد في عطبرة ويا مؤمن يا مصدق قمت مشيت ليهو. (عشاني عشه كبده ذي الكبده.).وبعد داك قال تعالي نلعب قيم قيمن تنس طاولة. وتعال شوف اللعب . والقطر صفر ثم صفر قال لي ما تخاف ده المحول بتاع المحطة. بعد شوية قلبي اكلني…دورنا عربة المجروس ومشينا لقيتا المحطة (خلاء. كل حاجاتي في القطر الا الجواز في جيبي ولابس بطلون جنز مرقع ) .قال للسواق نلحق القطر. وانتو عارفين الوكاده السوق مش شويه قال له يا سعادتك الجاز ده شويه(تحت تحت سبيت لهم وقلت كلام فارغ كتير جوه قلبي). المهم رجعنا بتنا في الميز .(والصباح رباح ده اسم زوجتي ياسارة عبدالله بعد اذنك هههه).مشينا البنطون انا وسعادة (محتمة) وركبت لواري البصل الماشه كريمة عشان نحصل القطر في حلفاء القديمة.. واستمرت رحلتي اسبوع عبر اللواري في بلاد الشوايقة والدناقلة والمحس(في كريمه بنطلوني انشرط الترزي رقعه لي ههه) ده كلوا منك ياسعادة اللواء(محتمه). قائد الفرقة الأولي ولاية الجزيرة. وهسي لما شفته سعادة الفريق اول البرهان في مدني وهو نازل من الطياره وانت تستقبله.وضابي العصايا في عباطك(قلت لك وانا في كردفان يا (محتمة) علي وزن (يا سارية الجبل). انت قايك انتصارك في مدني جاء ساكت (.الشفره جاتك من جبال النوبا هههه).يا سلااااام بالنصر المؤزر وبالفرح الذي عمي ولاية الجزيرة وعموم السودان وناس مدني وزعوا الحلاوة والبلح حتي الجيش وزع معهم الحلاوة وناس مدني كلهم قالوا الجيش جيشنا ونحن اهلوا ونتستاهلوا.

المك/داؤد ابوكلام داؤد. الاثنين ١٨ ديسمبر٢٠٢٣