قطوعات الكهرباء أزمة معاصرة للسودان .. مرام احمد

* قطوعات الكهرباء أزمة معاصرة للسودان .. مرام احمد *

(الكهرباء قطعت والغزالة رااااايقة)
الكهرباء جات.. الكهرباء قطعت
ليه الكهرباء تقطع أصلاً؟؟
هل الدولة ما قادرة توفر كهرباء للمواطن ولا الفهم شنووو؟؟
هل تعلم أعزك الله ورعاك انو نحن ما مفروض الكهرباء م تقطع مننا خالص!!
قول لي كييف؟؟
طيب.. جيب ورقة وقلم وتعال نحسبها بالمنطق البسيط.
اولاً: اظن انو كل سوداني بعرف انو الطاقة التصميمية لقطاع الكهرباء في السودان تعادل 4500 ميجاواط، وانو الحاجة الفعلية للكهرباء في كووول البلد ما بين 3000 الى 3200 ميجاواط..
لحدي هنا خلينا نقيف ونسأل نفسنا سؤال منطقي طيب ليييييه الكهرباء بتقطع طالما اننا عندنا فائض يتراوح ما بين 500 الى 750 ميجاواط؟؟؟
اظن اننا لحدي هنا ماشين كويس.. طيب تعال فكر معاي وخليك من العواطف والكلام الفارغ ووو ونحن وانتو ولازم.. والذي منو؟؟؟
حسب تقرير التحكم ليوم الاثنين ٢٥ ابريل ٢٠٢٢م تم قطع الكهرباء من القطاع السكني حيث تراوحت فترة القطوعات ما بين 5 الى 6 ساعات في الفترة الصباحية ما كدا وبس تاني كمان قطعت المساء لاكثر من (أربعة) ساعات.. وشملت القطوعات معظم أحياء الخرطوم والناس جاطت .. ودا شنو ودا البيحصل دا .. واصلو ما معقول وإنعل أبو (…) الحكومة (…) وربنا ينتقم من … (فكي جبريل).. والمجلس السيادي (…) ومجلس الوزراء وعييييك شي سب دين وشي (ميتين) وشي (…) خليها ساي ما خلوا ليهم (جمبة) يرقدوا عليها..
وهاكى يا ردحي ولو كان () … وكان عمل وعمل … والله حالتكم تحنن يا السودانيين تلقوها من وين ولا من وين؟؟
طيب حصل يوم سألت روحك وانت راقد بعد ضربت الابري لانو الكهرباء قاطعة والخلاطة ما بتشتغل والمنقة عايزة خلط.. حصل سألت روحك منو البيقطع الكهرباء وانت قبيييل قلت انو عندنا فائض كهرباء؟؟ ومنو العندو مصلحة يقطع الكهرباء.. هل (فكي جبريل) بيستفيد من قطع الكهرباء عشان يفشل نفسو؟؟؟
طيب عشان أنشف روحك وأنت باين عليك عطشان وكهربتكم قاطعة خليني أقول ليك الكلام دا.. وأوعك تجيني ناطي وتقول لي أنت كوز ولا أنت داعم للعسكر ولا الكلام الفارغ البتقولو فيهو دا …
أنا ببساطة عايز أرطب وأنوم أقوم قبل العصر كدا وأستحم وأمشي ألعب لي قيم قيمين بلي ستيشن، والمساء أحضر ليفربول دا كلو حلمي..
لكن قبل ما تنسيني خليني أقول ليك منو السبب في انو الكهرباء تقطع.. أفتح راسك كويس وسجل الكلام دا ولو مغالطني أمشي اتأكد بي نفسك!!
نمرة واحد في زول أسمو (محمد وداعة) الزول دا بي صراحة عامل فيها حزب بعث لكن شغااال من زمان مع صلاح (قوش) تتذكروه بتاع البت الطلعت البندقية من الشنطة وضربت الدكتور!!
(قوش و(محمد وداعة) شغالين مع بعض من زماااان و(محمد وداعة) ما ناكر الكلام دا … طيب (محمد وداعة) و(قوش) عاملين شغل رهيب مع ناس الحزب العجوز عرفتوه مش كدا؟؟ ياخ طيب بالواضح كدا (قوش ومحمد وداعة) وناس الحزب الشيوعي بعد ما قصة المظاهرات دي شكلها كدا حتنتهي بمشاركة الجماعة إياهم في الحكومة.
فكروا ودبروا انو يلقوا ليهم حل مع المواطنيين ديل .. طوالي خلو (محمد وداعة) يجتمع وينسق مع زول كدا شيوعي شغال في الكهرباء اسمو أمين عثمان ماسك شنو كدا ما عااارف .. المهم في الأمر الجماعة ديل رتبو مع زول تاني كدا اسموا عثمان ضو اللبيت مدير الشركة السودانية للكهرباء بذات نفسو.. وبعد داك عينك ماتشوف الا النور هههههاااي أقصد عينك ماتشوف الا الضلام … انت أمسك لي وأنا اقطع ليك … وانتو شغالين لي سب دين في (فكي جبريل) المسكين ههههاااي… ولو مغالطني أسأل مريم الصادق ولا أقول ليك أسأل (برطم) ههههاااي … أسي كمان تقوم تقول لي مريم وبرطم الدخلهم شنو؟؟؟ أقول ليك ما دخلهم أي حاجة مريم حبيبتنا وحبيبة ناس كتاااار كمان … أما برطم أبو صلعة داك خلي كووم براهو … الزول دا من يوم ما شفتو قلبي أباهو … والله ياجماعة كلما أشوف برطم دأ بتذكر شتيمة (المعرص) وما في زول يجي يقول لي أسي شتيمة المعرص الدخلها شنو ؟؟؟ المهم جات كدا يا جماعة ما تحكوها شديد كدا لمن تجيب الزيييت.
شفتو الزيت دا كيف؟؟؟ يا خ دا زيت الزيت زاتو !!
خلينا نرجع لي موضوعنا بتاع الكهرباء المطلع زيت أبو أهلنا زاتو!!
كلامي دا اسمعوه كويس واتذكروا انو يوم ١ شهر خمسة الجاي علينا دا حيتم زيادة فاتورة كهرباء المشاريع الزراعية بنسبة ٥٠٠٪ أبو الزفت زاتو .. طبعاً عشان الجماعة المنسق معاهم (قوش وبرطم) و(محمد وداعة) والشيوعي يلقو ليهم سبب يطلعوا يشتمو بيهو الحكومة ويقفلوا ليهم شارع شارعين كدا وتعال يالجزيرة وهاك يالعربية الحدث!!
المهم ياجماعة ان شاء الله يوم واحد شهر خمسة البل جاييكم تاني.. بل زي البل .. البرمجة تمت (وسوسن) ما بتقصر قامت بالواجب تماماً؟؟ وأصلاً مافي سبب بيخلي الزيادة دي تتم ولا تتنفذ لانو أصلاً الزيادة غير مبررة ومافي داعي ليها لكن نعمل شنو مع (قوش) دا والله غلبنا عديل كدا نسوي معاه شنو؟؟؟ بالمناسبة سؤال متعارض كدا انتو الانتربول عمل شنو مع الزول دا؟؟ ياخ معقولة زول قاعد يمشي يحضر الكورة في الاستاد ويضرب في الشيشة ماقادرين يقبضوه مخلنوا معذب المواطنيين كدا؟؟
نرجع للكهرباء وبلاويها وللناس البتسأل كلو يوم انو استهلاكي مالو بقي كتير كدا؟؟ والناس البتقول شفطوا كهربتنا أمبارح جبناها كانت ١٠٠ كليو هههاااي والله حكاية!!
برضو نقول ليهم أسألوا (قوش) وجماعتوا وين ودوا جهاز أسمو (الفار) ما الفار بتاع ناس الكورة!! دا الفار بتاع ناس الكهرباء البينظم الاستهلاك للناس … طبعاً الجماعة وقفوا الجهاز دا وشغالين هاك يا شفط في كهربة الناس … تخلي العداد مليان تصبح تلقاه فاضي!! ياربي الكعوك بتاع السمسم يكون مع الظروف دي بقي يشفط الكهرباء!! كعوك يا كعوك أنت ياخ في كعوك أكثر من (قوش) وجماعة الشيوعي المالين الكهرباء وناس محمد وداعة ببرطعوا زي ما عايزين.. ياخ طلعتوا زيتنا زاتوا!
ياخ والله نحن مصارينا اتهردن زي ما بيقول (الخال).. شفتوا محطة ام دباكر الفي مدينة ربك بتنتج ٥٠٠ ميقاواط.. الجماعة عندهم ناس هناك شغالين يعطلوا الماكينات، وطبعاً ناس الحماية والتأمين في ناس حامينهم خاصة (المقدم) و(العقيد) داك أيوة ياهو زاتوا اشتغل ساي عوجة بتجيك مافي طالما زول السيادي داك واقف وراك قنا..
ما قاصد برطم عشان ما تفهموني غلط دا واحد تاني (جابر) للخواطر و(جابر) للكسور والبواقي وشغاااال شغل تقيل وعمك (البريك) ضارب الضللة وما جايب خبر هههاااي غايتوا جنس غايتو!!
بالمناسبة جماعة الحزب (الشيوعي) لاستوردوا معدات للكهرباء من الصين (لعشرة ألف) عداد كهرباء ليه صنعوا (سبعة ألف) عداد بس وين باقي العدادات؟؟ ياخ سيبك هو أصلو الموضوع من البداية تم من غير عطاء يعني (أم غمتي) حلال عليكم (الجغمة) ان شاء الله محل ما (تسري تمري) بالمناسبة تاني عندي كلام داير أقولو ولا سيبك ياخ طالما شركات (قوش) هي لسة المورد الحقيقي لمعظم احتياجات قطاع الكهرباء الحكاية (انبشقت) ونحن (انبشقنا) والكهرباء قطعت؟؟ العن (…) (قوش) (وبرطم) وانعل (…) (الشيوعي) وفكي جبريل وزول القصر الوهم داك ان شاء الله دائماً(جابر) خاطركم وكل عام والكهرباء قاطعة والغزالة راااايقة.