نفحات وفيوضات إيمانيه رمضانيه

زاوية خضراء.
بقلم:داؤد ابوكلام داؤد.

نقاء.. صفاء.. طهر.. تشعر وكأنك جوه جنة وأصبحت كالفراشة احلق في حدائق الإيمان. حيث آيات القرآن وكلام الله. مش اي كلام يا ابوكلام. بل كلام الله العليم الخبير. يعني خبره ذي الخبره. يعلم خائنة الاعيين وماتخفى الصدور.. ويعرف كل علائبنا ولولوتنا. مش ذي ناس فلان الفلاني!؟ قال خبير دولي قال.. وهو ما عارف ذاتوا المواسير دي البلوفات بتاعتها مدفونه وين!؟ . الليله دايرين نقيف في ظل الروحانيات الصافيه ايام أواخر رمضان هذه.!؟ انه شهر الهدي ونزول القرآن. (خلو بالكم يا هدي عربى والسر قدور معانا). يا سلام يوم فتحت السماء ونزل الملائكة تنزيلا. يا لمنظر الملائكة وهم نازلين من السماء ما قادر اتخيل واتصور روعتهم وجمالهم وبهائم وهيبتهم!؟ هسي شوف ناس قوات المظلات والصاعقة الواحد لما ينزل بالبر شوت وحاضن سلاحوا كدي!؟ . خلاص يا دنيا ما فيكي الا انا!؟ ونحن ننسي أن خالق الدنيا هو وحده القادر على كل شئ (أن الله عنده علم الساعة وينزل الغيث) امبارح وأول امبارح شايف نزلت مطره في مدني وكثير من قرى الجزيرة وفي كادقلي وعدد من مناطق السودان. الله انا من الرشاش الرشه الله من رائحة المطر و الدعاش!؟ (يعلم ما في الأرحام) يعني من المرأة تبدأ تسوي تف.. تف.. تف. عندي حرقان!؟؟ ربك عارف سبب الحرقان وما جرى قبل الحرقان وما بعد الحرقان.. ومنو الجاب شوالات الطلح. والجاي منو وها يموت بتين.. لك الرحمه الواسعة الشيخ /الزبير أحمد الحسن.!؟ (وما تدري نفس ماذا تكسب غدا وما تدري نفس بأي أرض تموت أن الله عليم خبير). خبره يعني خبره عارف كل صغيره وكبيره.. وناس أزالت التمكين وين القروش.. في زول اسمه نادر العبيد قال ليكم هو عارف فسادكم بعدين اوعكم من الفسو !؟. وحمدوك كمان قال أمس هو مع حرية الصحافة وذلك في ذكري اليوم العالمي لحرية للصحافة والذي يصادف الثالث من مايو من كل عام طبعا انا كنت ممثل السودان في مجال الحريات الصحفية بشرق أفريقيا.!؟ بس نقول ليك لو مريت بالمقرن شارع بنك السودان والبنك الزراعي أدي نظره تجاه الشمال غرب شرطة النجدة بالله شوف اتحاد الصحفيين هل هذه هي حرية الصحافه عندكم. حارسوا بوليس في البوابه. وجوه خراب ما بعده خراب ربما تجد قرد أو قردين قاعدين يا كلوا بقايا ثمار التمر هندي.!؟.وفي صحفيين دافعين مقدم أقساط البيوت والعربات وحار بهم الدليل ينتظرون المجهول. مافي اي يوم عالمي للصحافه في بلدنا دي. !؟.(والله يعلم علم اليقين بحرية الصحافه في السودان هل صح ولا كضب). في سورة السجدة الله قال (الله الذي خلق السموات والأرض ومابينهما في ستة أيام) اسبوع بس سامعين الكلام ده ياناس الجبال الستة ستين سنة ما قادرين نعمر ونطور ونوحد الجبال الستة ونقول لكم الحكمه ثم الحكمه وإياكم وطيش الشباب !؟ (ثم استوى علي العرش) ياناس عرش الفترة الانتقاليه هل هي ثلاثة سنه ولا ثلاثين سنه. خليكم واضحين معانا. !؟ (يدبر الأمر من السماء إلى الأرض ثم يعرج إليه في يوم كان مقداره الف سنة مما تعدون) يعني البنزين والوقود بتاع السودان ده كلوا لو ملانا به تنوك الطيارة وطرنا الي السماء يا دووبك نكون مرقنا من السحاب وماشين علي السماء نمر واحد!؟ وشط الطياره قطعت وقود!؟ ههههه لازم نرجع السودان ونشوف كلام الوقود ده.؟؟ (الف سنة مما يعدون) يا لعظمة الخالق القادر بديع السموات والأرض.؟ الله ده فوف فوق بعيد شديد لكنه أقرب إلينا من حبل الوريد. انه خبير عليم. يا لخسارتنا والخساره الكبرى أن لا نرى نور وجهك الكريم. اللهم نسألك ببركة هذا الشهر الذي أنزلت فيه القرآن أن ترزقنا النظر الي وجهك الكريم. بهرتنا يا الله بجمال ما خلقت من النساء في الدنيا ما بال الحور العين عندك!؟ وكيف يكون جمالك يا خالق كل جميل!؟ بس يا ربنا بصراحه عندنا بعض النساء في السودان شغالين حبوبي وحبوبك حقنتي وحقنتك وجلخك جلخك برط ذي البرط.. نحن دايرنهم كده بجمالهم الاسمر ولون الكاكاو الطبيعي لكن هم قالوا لا. ويارب انت قلت لنا مثني وثلاث ورباع عشان نلمهم كلهم ونوفر قروش الجلخ اللهم اهدي نساء السودان! يا خالق كل جميل؟ جمل ايام السودان القادمات بالخير واليمن والبركات. وشتت شمل من كرهنا وعزبنا وعطشنا وبهدلنا وجعل كل أيامنا ظلمات اللهم فرج كربنا بليلة القدر يا الله.يا قادر!؟
المك/داؤد ابوكلام داؤد الثاني والعشرون من رمضان ١٤٤٢ هجريه الموافق الرابع من مايو ٢٠٢١.