مختارات من دردشه حربيه .. بقلم د. عباس حديبة

حصل انت اتدربت عسكري؟
وقفت في صفوف الكشف الطبي، صرفو ليك هدوم بياده، جرفت ميدان، شغلوك طلبه في المركز ونظافته،
حصل وقفت في الطابور من بعد صلاة العشاء لغاية قبل الصبح،
حصل فكيت وركبت سلاح، اخدت محاضرات قانون، اشتغلت عُقل وبياده،،
قرصتك عقرب في مركز تدريب، حصل لبست كاكي سااااي، حصل ضربت نار في الدروه، حصل سديت خدمه اداره في منشأة للصباح، حصل دخلوك كركون ولا دخلوك مكتب،
حصل بقيت جندي؟
خشيت معارك؟
اتدرجت بالربط في وكيل عريف تشريفيه سنتين؟
انا ماعاوزك تصل من وكيل العريف وشغلو شنو واهميته في الجيش لانو دا بحتاج لحصص كتيره جداً والعريف دا حاجه تانيه والرقيب دا حكومه قائمه بذاتها رقيب اول دا خلاص نضج ويتأهب لمرحلة التخطيط لغاية حضرة الصول اووووك حضرة الصول دا في السرير ما بتقعد جنبو..
لو قعدت جنبو الناس بتنظر ليك انت ملكي ساااي،،
حضرة الصول دا قيمه عند الضباط وضباط الصف..
انا ما عاوز اخش ليك في رتب الكليه لشنو لانها عميقه شديد وح تقوم تروح مني
نقيف في حضرة الصول دا بس

طيب يا سيدي انت بتنظر في المتحرك الفلاني والعلاني اتحرك ودا المفروض اتحرك انت قايل الناس دي لاعبه (بلي)
يااااخ في غرفة قياده وسيطره وفي قادة ميدان ديل عارفين حتي الجندي البلغ مرض صباحي بالنفر عارفين حتي شوال الدقيق الباقي فيه كم (كوجه)
ما محتاجين لتوجيه من ملكي انت نجض لينا ملكيتك والباقي خليه للناس العاملين (فرق) وأعني بالفِرق ومفردها فِرقه دي عندنا نحن الملكيه كورسات و ورش عمل ،،
ناس عامله بكالريوس، وماسترات، ودكتوراه في الحرابه دي بس،
ما محتاجين لتوجيه الا اللهم تشوف عدو خفي او ما يعيقهم وتنبه عليه لكن اتحركوا ارجعوا دي ما شغلتك..

بدأ تململ بعض الناشطين بدوافع (سياسيه) صياح بحلقوم (قحط) عن تحركات الجيش يقول ليك المفروض اتحرك فلان و يرجع علان ومثل هذه المنشورات مقصوده لزراعة اليأس في الشعب السوداني لكي يضم صوته لصوت غرف قحت،،
هذه الايام تجد منشورات فيها خبرين بطريقه عاديه يناصر الناشط فيها الجيش ومحشور خبر في النص (ساندوتش) يقلل من شأن جيشنا العظيم،،
او يشير بخبر للمليشيا انها انتهكت وقتلت وحرقت ووو
مع ان المليشيا دا شغلها الرسمي في البنيات التحتيه وممتلكات المواطنين،،
او يحاول يرمي مابين الجيش والقوات المحاربه معه بأفرعها.
يقول ليك المفروض وما المفروض،،
وحتي الموتورين عندما يشاهد موتر يقبل علي الناس و(سافي) كمان يقول ليهم الطيران وين؟

يعني يا عشا البايتات الطياره تكب ليها ثمانيه براميل وقود عشان تجي تدق ليها موتر؟
كدي يا النجيض ما خسران جيشك،،

عموماً تاني كان كتبت عن التحركات بتكون قحاطي عديل و ما عندها تفسير غير ذلك

خلاص؟

✒️ عباس حديـبه