زاوية خضراء .. بقلم: داؤد ابوكلام داؤد .. مساكن النمل وطائر الهدهد.؟

والله يا جماعة تأملات قرآن الفجر المشهود بالملائكة ونفحات الصباح. تجعل الإنسان صافي الذهن ونقي الروح و الفؤاد وبكده يبدأ يومك جميل وحلو والعجب إذا صاحبته شقشقات ونغمات الطيور وهديل الحمائم بيكون أحلي وأجمل ؟؟؟. في هذا اليوم المبارك من يوم الجمعة. توقفت وكأني أول مره أتوقف علي آيات هذه السورة ؟؟ سورة النمل في الجزء التاسع عشر ص(٣٧٧). (طس تلك آيات القرآن وكتاب مبين هدي وبشري للمؤمنين ). يا سلااااام علي هذا الهدي وهذه البشري.!!! في ذات سورة النمل قال الله تعالي لسيدنا موسي. (يا موسي إنه أنا الله العزيز الحكيم ) في واحد من الشباب في السوق قال لي تعال يا خال أنا بعزك.؟؟ وتستمر الآيات (والقي عصاك فلما رءاها تهتز كأنها جان ولي مدبراً ولم يعقب ) ما قلتوا نوبا سيدنا موسي جري جنس جري ههههه ربنا عشان يطمن سيدنا موسي قال له(أني لا يخاف لدي المرسلين ) بعد داك كلكم عارفين بقية القصة. وفي نفس السورة آية(١٥) قال(ولقد ءاتينا داؤد وسليمان علماً ) علوم ذي العلوم!؟؟ علم مع النمل وعلم مع الطير وعلم مع الجن وعلم العفاريت ذاتووو علم عن أشياء كتيرة؟؟ وهذا الفضل كله من الله(هسي انت لو عزمك زول من أصدقائك في فندق أو مطعم فاخر سمك وشواء وبيتزا وقال لك تفضل !؟ تفرح فرح ما بعده فرح مع الجوع والعدس والنزوح والهجرة الفينا دي ؟؟؟ وتستمر حلاوة القرآن(حتي إذا أتو واد النمل قالت نملة يا أيها النمل أدخلو مساكنكم لا يحطمنكم سليمان وجوده وهم لا يشعرون) ٠ عزر ذي العزر !!؟؟ تصدقي يا نمله هسي في ناس في السودان يشعرون ويدخلون مسكنك ويطردوك وكمان يحطموك ويقتلوك ويسكن بيتك ذاتووو.؟؟؟ بالله يا أبوكلام ده ياتو نوع من النمل البتكلم الكلام ده وانت عارف هناك انواع من النمل لا تحصي ولا تعد؟؟ هناك النمل الضر أو الذر والنمل الشحموطة والنمل الاسود أبو راسناً كبير..!؟ وهناك نمل السكر أبو عشة ونمل الغابات الشرير ما عارف اسمه بالعربي شنوو لكن بلغتنا النوبية اسمه ( ششييت ) كن عضاك تعمل الي تسوي ( سيك ميك.. سيك ميك ) هنا تبسم سيدنا سليمان ضاحكاً من قولها بعض الناس تلقاهوا يضحك مباشرتاً .ها.. ها..ها..ها..لا. لا..مش كده أول حاجة إبتسم وتبسم ورينا سنونك ما مهم تكون ذي سن الغزال أو الحمار أهم شي خليك دائما مبتسم ؟؟ وهنا سيدنا سليمان شكر الله علي هذه النعمة نعمة معرفة لغة النمل والطير وغيرهم بعد دااك( وتفقد الطير فقال مالي لا أري الهدهد أم كان من الغائبين ) عجب..عجب..عجب.. وستين علامات إستفهام ؟؟؟ هسي بعض الحكام والمسئولين لا يتفقد حتي الرعية والبشر التابعين ليهم.!!؟؟ وسيدنا سليمان يتفقد حتي الطير ويتبسم مع النمل. ؟ شوف جنس البقتل النمل بالبدرة والمبيد ده غايتو؟؟ يا أخ حتي الجن والعفاريت تفاهم معهم. وديل كلهم أمم أمثالكم؟؟؟ هناك أمم الفار وأمم الكلاب وأمم الذباب والضباب وأمم القوعنجات و أمم البط والوزين وأمم الكدايس يعني لو مسكنا الخرطوم وحدها فيها كم كديسه وأين تسكن الآن.!!؟؟؟ والله يا ناس القرآن ده لو تأملناه وفهمناه بخلي الزول مرتاح راحة ما بعدها راحة حكم و قصص أحلي حتي من عسل النحل..؟؟ عموماً الكلام حلو وجميل وسلس ولكن نختصر ونقول طائر الهدهد قام بالمهام والواجب واستشعر المسئولية وعارف شغلوا رغم التحديد بالزبح والقتل وهو واثق من نفسه وجاء بكل ثقه وقال لسيدنا سليمان (وجئتك من سبأ نبأ يقين ) المليان ما بخج ؟؟؟ النبأ اليقين هو الكلام الجد جد (مووو كضب ) والكلام الحقيقي والمنطقي ؟؟ هسي في ناس غير النجر والكضب والدجل وكسير الدلنج ما عندهم حاجه.!!؟؟ الهدهد قال هو لقي أمرأة هي وقومها عندها كل شي ولها عرش عظيم لكن المرأة دي وناسها قاعدين يسجدوا ويعبدو الشمس من دون الله !!؟؟ والشيطان زين لهم ذلك يا نبي الله سليمان هسي الناس ديل كن عبدو الله بجي شنووو. ؟؟؟ سيدنا سليمان قال خلاص شيل الكتاب ده وديهوا لها ونشوف بعد دااك الحكاية شنووو؟؟ والهدهد قال كده وطار ما عرفنا شال الكتاب في منقارو ولا كرعينوا.؟؟ ومشي القاه ورماهوا لهم وكان الكلام مختصر وبسيط (إنه من سليمان وإنه بسم الله الرحمن الرحيم ألا تعلوا علي وآتوني مسلمين ) ذي حقت السودانيين للأمريكان دييك(ما ماشين ولا جايين جنيف جده بس) يعني ما دايرين سيك ميك والحركات ديك؟؟ تعالوا بس مسلمين؟؟ وكانت ملكة سبأ سيدة الجمال والمال والرجال طوالي شاورت ناسها واحدين قالوا لها نحن ناس قوين وناس بأس .؟؟ لكن الكلام ليك يا ملكتنا طبعاً أكيد ماقالوا لها (يالمطيره والمنططه عينيك) قالت لهم ديل( إن الملوك إذا دخلوا قرية أفسدوها وجعلوا أعزة أهلنا أزلة وكذلك يفعلون ).؟؟؟ يا حليك يا ملكة سبأ كأنك تقصدين الجنجويد وأفعالهم مع أهل السودان. ؟؟؟ قهرو الرجال وأزلوا النساء. ؟؟؟ بعد داااك استمرت القصة بينها وقومها والهدهد وسيدنا سليمان والجن والعفاريت وبناء الصرح وكيف جاءت (قيل لها أدخلي الصرح فلما رأته حسبته لجه وكشفت عن ساقيها ) يعني كانت مرأة محتشمه ومحترمه في لبسها.؟؟؟ساقين ذي الساقين مش ذي ناس كده ساقهم ذي ساق السمبرية ولا النعامة ما تعرف ؟؟ وهنا أكيد إتبهدل كل الحضور من النمل والهدهد والطير والجن والعفاريت وإحتمال سيدنا سليمان ذاتو قلبوا دقة وعمل شححح .!!! ومن هنا نبعت شرارة الحب؟؟؟ في جماعتنا كده مش يكشفوا الساق كن كشفوا شنوا داااك صبر جميل والله المستعان الحياة قسمة ونصيب؟؟ ونواصل بإذن الله في تأملات آيات القرآن. ؟؟

المك/داؤد ابوكلام داؤد. مدير مركز عيون التلال الاعلامي. الجمعة ١٣ سبتمبر ٢٠٢٤