زاوية خضراء .. بقلم: داؤد أبوكلام داؤد : الشعب وقوات الشعب المسلحة.؟

الأجواء في السودان هذة الأيام تعج عجاً بأحداث جمه وكتيره ماعرفنا نمسك ونحل ياتو..ولا ياتو…؟؟! بجاي الدنيا خريف والحمدلله مطر وغيث نافع رغم الوحل والطين والخيران. بعضه ضار مثل السيول التي حصلت في كثير من ولايات ومدن وقري السودان المختلفة خاصة في ولايتي نهر النيل والشمالية وحركات نهر القاش السنوية المعروفة في كسلا. وسط أحداث السودان هذه جاءت مفاوضات (جنيف ) لوقف إطلاق النار وفتح المسارات الإنسانية لتوصيل الإغاثة.. وضرورة خروج الدعم السريع من الاعيان المدنية وسط لفافة واستعجال أمريكي داير يكلفت الشغلة سريع سريع. ولكن وزير الدهب (أبو نمو).رئيس الوفد الحكومي في لقاء جدة الجدادة التمهيدي ؟؟ لما شاف الكلام ماشي أعوج قال لوفده يا الله نرجع السودان بلا لمة… بلا لمة…تريللو الامريكي ولا تريليون ولا دشليون ذاتوا طلاق تلاته تاني ما نقعد ؟؟؟ وطبعاً الشعب السوداني أغلبة واقف مع قرار الحكومة.(حماقة ذي الحماقة) رغم جراح النزوح والتشريد واللجو والغلاء والمرض وإغلاق الطرق وقصف المدن بمدافع الجنجويد الإرهابية في الفاشر وأم درمان والأبيض وقتل الطلاب الأبرياء وتدمير المدارس.؟؟!! في هذه الظروف المعقدة التي يمر بها السودان. ظهرت علي السطح وفي سماء السودان الآمال العراض ممثله في المقاومة الشعبية المسلحة تحت إشراف القوات المسلحة وبحماس منقطع النظير. !!! طبعا هنا تدخل (قلبي الحنون الطيب).قلبي قال لي أقيف. أقيف كدي.؟؟ يا أبوكلام واحد.. واحد..عشان نفهم معاااك بعد داااك نمشي قداام؟؟ قلت له يا قلبي غايتو مرات عندك جنس حركات. ؟؟ قال لي معليش أنا مش قلبك.؟؟ المهم عرفته هو قاصد نفسر له عنوان الزاوية الخضراء كلمة الشعب وقوات الشعب المسلحة.؟؟!! قلت له يا قلبي السودان ده من الله خلقوا بلد حرب في حرب ودواس.؟؟؟ منذ الممالك النوبية الكوشية القديمة ودخول العرب والإسلام بلاد النوبا. مرورا بدخول الانجليز والأتراك ومن شاركهم من المصريين وغيرهم.؟؟ حتي الثورة المهدية وعند استقلال السودان وجد قوات إسمها (قوات دفاع السودان). ثم تطورت الي قوات الشعب المسلحة. ؟! ومن ثم ظهرت القوات الأخري التابعة لها في التسليح كالشرطة والأمن وقوات الدفاع الشعبي والشرطة الشعبية وسامع تحت تحت جاري الإعداد لقوات دفاع أقليم جبال النوبا. لا إدري هل هو تغيير لاسم الحركة الشعبية ولاشنو ما عارف. ؟؟؟ ويا قلبي ما تستغرب كل شي وارد ؟؟ والجديدة لنج يا قلبي ظهور قوات المقاومة الشعبية المسلحة وطبعا نعوذ بالله من قوات الدعم السريع الجنجويديه الأرهابيه. ؟؟ المهم يا قلبي الشعب لما شاف قواته المسلحة ما قصرت في قتال العدوان لشتات العربان ولمدة عام ويزيد ؟؟؟ وقدمت الغالي والنفيس وأرتال من الشهداء والجرحي وترملت نساءهم وتيتم ابناءهم. ؟؟ قال الشعب كلمته وقال نحن ذاتنا نتسلح لأن الكلام دخل الحوش والبيوت والغرف والاعراض واغتصاب النساء والبنات. ؟؟!!! قال لابد من أن نساند قواتنا المسلحة.؟؟ قلبي فرفر كده وقال لي غايتو.. غايتو اقنعتني. ؟؟ قلت له انا عارفك كويس وعارف حركاتك وشرايينك ذاتو.؟؟؟ وقلت له كمان هناك قوات اخري بعد حسم هذا التمرد..وهي قوات الشعب لإعادة الأعمار وقوات الشعب الاقتصادية وقوات الشعب الاجتماعية والأهلية وقوات الشعب السياسية وقوات الشعب الزراعية وقوات الشعب لإعادة المهاجرين والنازحين من مراكز الإيواء .؟؟؟ وبعدها تتحول كل هذة القوات لقوات السلاااام وبناء وإعادة إعمار السودان علي أسس جديده.؟! هههه (أوعك تفهم غلط دي ما بتاعت فلان السجمان دااال ) وعشان نسند قوات الشعب المسلحة يا سعادة اللواء(م) بشير مكي الباهي قائد المقاومة الشعبية المسلحة نقترح وللظروف الاقتصادية والحصار المضروب علي السودان. صيانة الأسلحة التقليدية الموجودة طرف المقاومة الشعبية الآن(طبعا سامع واحد قاعد يقول ده تفكير بلييد ) بليد . بليد..لكن هذه الأسلحة قد لعبت دوراً فاعلاً في كردفان؟؟؟ وهناك من هو قادر علي صناعة الرصاص والبارود من المواد المحلية بالتنيسق مع النساء في الريف ؟؟!! طبعا دي اسرار لو عندك رغبه نسمعك لها (براااك في اضانك). الأهم الآن الشعب كله يساند قواته المسلحة عبر المقاومة الشعبية لكن بصراحة يا سعادة/ البرهان. القائد العام للقوات المسلحة خليك سريع الإيقاع في قراراتك وأحسم الفوضي الشعب معاك خايف من شنو تاني؟؟؟ ختاماُ نزجي جزيل شكرنا لقوات الشعب المسلحة في ذكري عيدها السبعين وهي تتصدي لأكبر مؤامرة في تاريخها ونسأل الله لها النصر في معركة الكرامة الوطنية وهزيمة عربان الشتات

المك/داؤد ابوكلام داؤد. مدير مركز عيون التلال الاعلامي. الجمعة ٢٣أغسطس٢٠٢٤