زاوية خضراء .. بقلم داؤد ابوكلام داؤد : وين كتاباتك إلينا.؟؟

تلقيت عدد من الرسائل والكتابات والمحادثات والكلامات وكل أنواع الثناء الجميل من احلي الأحباب والقراء والمتابعين لزاويتي الخضراء المتواضعه التي أساهم بها في الدفاع عن الوطن من أجل سلام واستقرار ووحدة أهله وشعبه (سامع تحت تحت ) في زول قاعد يقول جنس غرور. طبعاً بجانب الأحباب هناك الحساد والحقاد والعوازل وإن يظهر لك البعض بأنه من احب الحبايب (لكنهم بيني وبينكم دبايب ) وفي قرارت نفسي مصمم أن أكون ذي صاروخ الفضاء كل مرحله بحرق جزء منهم وانا صاعد الي عنان السماء .؟؟!! أما الي الذين أحبهم وأجلهم وأقدرهم وتزداد سعادتي بتواصلهم أقول لكم من أسبابي غيابي الايام الماضيات اولاً جاء اخي حسن ابوكلام من البلد وهو موظف بالرعاية الاجتماعية بهبيلا ويعاني من بعض الآلام والغدد وظلننا نجري ونجري في شارع الدكاترة حتي وصلنا مركز الأورام نسأل الله له شفاء لايغادر سقما.

(المؤمن مصاب). ومن جهتي أصابتني مصيبة الملاريا وبسبب هذه الملاريا أنا تركت الشاي منذ العام ١٩٩٦ وتاني ما عارف دايره تخليني الظاهر اترك أكل ( الفول المصري والعدس). ولا شنوا ؟؟ طبعا المره دي جاتني عبر المعدة وتعال شوف الجري وبدل أن تكتفي بهذا الاتجاه قبلت غادي في شكل طراش وبقت (جاي وجاي ) وظهرت ثالتاُ بجاي ههههه في شكل (عرق يتصبب من جبهتي كأنه المطر و وكذلك في مجري الظهر ).

وبحمد الله الآن تماثلت للشفاء بس شاعر (بخشمي مسيخ شكلوا داير شية وشطة خضراء). وكذلك الدنيا صارت مسيخه وأنا أتابع أحداث الجزيرة وقرية ود النورة بريفي القرشي والمناقل وكيف قتلت مليشيا الجنجويد الأبرياء العزل من الأهل هناك.بولاية الجزيرة.

ومتابع تسلل البعض منها الي بارا وكذلك أحداث هجومها الي الأبيض مؤخرا وكيف فقدت الأسرة اربعة من ابناءها بما فيهم ابن خالي وخالتي شقيق زوجتي برتبة رائد مازالوا في إعداد المفقودين ؟؟؟ وما زلنا ندعوا للأهل بالفاشر بالثبات والنصر وكيف رأينا استبسال قواتنا المسلحة والقوات المشتركة والمقاومة الشعبية للدفاع والزود عن الفاشر من فلول عربان الشتات ؟؟!!

ويعتصرنا الألم من المجاعة في جبال النوبا بفعل عبدالعزيز الحلو الانتهازي والمتاجر بدماء شعب النوبا. ؟؟ شتان ما بين سعادة النائب مالك عقار (جده والجداده) .

وضحكت حتي وجعتني ضلوعي رقم ألم الملاريا عندما رايته (الشلاليت والبنيات وتطاير الكراسي في مؤتمر تقدم باديس ابابا بس جاري البحث عن السبب ). رغم ان البعض الآخر يرجع السبب للشرابات المرات.؟؟؟.

وتابعت كيف ان سعادة البرهان زار بعض المتحركات في عدد من الولايات وكمان سعادة/ (كبش) الاسمر الجميل الفتان يا الجدك المانجيل يا أزرق طويل الباع كيف زار ارض السمر في النيجر ومالي.؟! وبالامس القريب جاءت الفرحه والبسمه بفوز السودان ثلاثة صفر علي جنوب السودان الشقيق وسامع تحت تحت بعض اللاعبين من جنوب السودان قالوا للمستشار توت قلوال كلم ناس سودان قول لهم كلام كره قدم ده خلوا تعالوا نلعب كرة (سلة )

هههه بالله لقيتونا قصار دايرين تدقونا وتتلسوا في رؤسنا. بس وين يا (بنج) كرة قدم بس عشان نحن والكورة نمر من تحت كرعينكم الطواااال ديييل (بثمنياتكم) تبكوا بس منوا قال ليكم انفصلوا. ؟؟؟ كم أحبك أنا يا جوبا يالشلت نور عينيه. ؟ لكم أحبابي جمعيا هذه كتاباتي ورسالاتي اليكم عدنا وسنواصل.

المك/داؤد ابوكلام داؤد مدير عيون التلال الاعلامي ١٢ يونيو ٢٠٢٤