زاوية خضراء .. بقلم: داؤد ابوكلام داؤد .. حمدوك والحلو ؟!
المثل قال (البخجل من بت عمه ما بولدها ) يعني لو عرستها من الضروري ان تدخل عليها شرعا وتنال من عسلها.؟؟ وبالتالي الزواج يعني المودة والرحمة والسكينة ويعقب شهر العسل الولادة ومن ثم السماية يعني بت عمك بقت مرتك وزوجتك خلي عامل فبها خجلان من الحركات دي.؟؟؟ يازول مارس حياتك انت مسنود من الله ومن شرعية الله.!!!
وأنا كذلك كلما مسكت القلم وداير اكتب عن الدكتور/عبدالله حمدوك رئيس الوزراء المستقيل الأسبق .؟؟؟ تجدني آسف وخجلان غاية الخجل من ولدنا و أبننا الاستاذ المحامي/عبدالرحمن حمدوك عبدالرحمن هذا الولد الخلوق المهذب الخجول كالفتاة في خدرها. ؟؟ وهو بن اخت دكتور/عبدالله حمدوك مكتبي فاتح في مكتبه وبيني وبينه مترين (بمجمع عمنا بصر حماد بالدلنج.) وتجاورنا الاستاذة/لبني حملون والاستادة/اخلاص وادي محمود. وعلاقت الأخ/ عبدالرحمن حمدوك ممتازه مع شقيقي الاستاذ/مبارك أبوكلام..لكن يا ابني واخي ويا أحلي جار رغم الاحترام والخجل منك اليوم ها اقوووم وأكتب عن خالك حمدوك وما تزعل مني؟؟ ما تبقي قصتنا معاااك ذي قصة دكتور بيلو بجامعة افريقيا العالمية وصديقي المصرفي من جنوب السودان الجاك أدور. له الرحمه والمفغره. قال له انا داير احكي قصة عن واحد من جنوب السودان بس عليك الله ما تزعل..يا الجاك قال خلاص يا دكتور ولما حكي القصه جاك ادور زعل وترك حتي جامعة افريقيا كلها وفات حتي توفاه الله مؤخرا بجوبا وما رجع خالص الخرطوم . (طبعا دايرين تعرفوا القصه مش كده جنكم شمااارات ههههه)..نرجع لحمدوك أكيد كثير من الناس ما عارفين علاقة حمدوك بالحلو.؟! اولاً حمدوك والحلو كلهم من سكان جبال النوبا ومن جنوب كردفان ترعرعوا وتربوا وسرحوا بالغنم فيها ودرسوا في مدارس جبال النوبا أكلوا العصيدة والكسرة وشربوا المديدة واكلوا اللعلوب حتي عمل لهم (اسهال).واكلوا القنقليز والقضيم والحميض والنبق وملاح الكول وكان عندهم (قمل ) في رأسهم وفي لباساتهم و ( المرقود) في عناقريبهم المجلده بالحبال. ( لا تغرنكم دنيا الفنادق وسراير الدبل ). وكمان زمان ما خلوا أكل الفار والصبر السنجاب والارانب وكل أنواع الجراد والطيور. اما عن انواع الشراب خشمي وعندي ؟! ما عندكم انسانية أكلتوا كل انواع الحشرات والحيوانات ما تخجلوا تمنعوا دخول الأكل الي جبال النوبا ؟؟؟ حمدوك حدثني من أثق فيه ثقه عميا من ناس القوز قال الزول ده هو وفلانه قريبتوا دييك. ؟ وقريبهم الكان وكيل وزارة المالية الاتحادية اظن لحدي قريب ده كان وكيل؟؟؟ ديل جندهم الحزب الشيوعي بدري.!!! وكمان كلمني واحد من دفعته في خورطقت الثانوية قال لي حمدوك كان خجول وسكوت وتلقاهوا ساكت ساي وما بتكلم الا في حاله واحده ( يمشي يقد السلك) بتاع مدرسة خور طقت ويمشي حلة الداجو يشرب المريسة؟؟ بعد دااك يجي يلعلع وينطط عيونوا ويضحك سبب بدون سبب ويبدأ يتفلسف ويعمل فيها سيد الكلام (كلام يا أبوكلام ).وأول ما تفك السكرة يسكت عن الكلام المباح.!!! وهسي احتمال شكلوا بكون تطور من شراب المريسة الي شراب الخواجات (الكافر داااك). وحمدوك والحلو تجمعهم جبال النوبا درسوا بمدرسة الدلنج الريفية وجامعة الخرطوم ويجمعهم الحزب الشيوعي والتمرد ضد حكومة السودان والمركز والجلابة والفلول والكيزان؟؟؟ والاثنين عاشوا اغلب حياتهم في شرق افريقيا وجنوب السودان. وهم اساس مشروع الحزب الشيوعي ومشروع الهامش لتنفيذ أجندة الحزب الشيوعي الحاقد الحاسد فاقد السند الجماهيري بالسودان. حمدوك منطقتهم في القوز بالدبيبات تبعد أقل من خمسين كيلومتر من منطقتنا بهبيلا من الناحية الشمالية الغربية وكذلك الحلو تقريبا بالفيض محلية الرشاد نفس المسافة من الناحية الجنوبية الشرقية. ؟؟ وحمدوك والحلو كلهم ما عندهم احترام للإدارة الاهلية. وده منهج الحزب الشيوعي لأنهم اصلاً ما عندهم كبير فيها . عشان كده دائما تلقاهم بحرش ناس الحركة الشعبية بجبال النوبا ويقولوا لهم لازم يتم تغير الإداره الاهلية ديل فلول وكيزان ونظام بائد (حرية ديمقراطية وووي يييي). حمدوك والحلو هم فلول الشيوعية وقحت وتقدم. وأنا شايف الناس في جبال النوبا وجنوب كردفان زعلانين زعل شديد من فشل مفاوضات جوبا الاخيره حول توصيل الإغاثة والمواد الإنسانية للاطفال والنساء والعجزة. تزعلوا كيف يا ناس ما هو ده دورهم من اسيادهم حتي جنوب السودان متعاطف معهم ما تسمع وتشوف حركات توت قلواك دي ده زول ثعلب وتمساح في نفس الوقت.؟؟؟ التاريخ سيقول للأجيال وبكل آسف ابناءنا من جبال النوبا ( الحلو والكباشي ) كانوا علي راس مفاوضات الجوع بجوبا. ؟؟ وهناااك في نيروبي حمدوك وهو يحفر مقابر الجوع ينادي يا فرده يا الحلو شتت امرق من جوبا والحقنا الدفن والعزاء مع عمك الرئيس الكيني وليام روتو.!؟ عموما يا حمدوك والحلو جبال النوبا وجنوب كردفان لن تمووت من الجوع ومن عجائب الدنيا هبيلا سلة غذاء كردفان تنتظر منكم الإغاثة الإنسانية في شكل ذرة !!! ويكون في علمكم نواياكم تجاه شعبنا اتعرفت والشعب بقي واعي وعرف اجندتكم الاجنبيه والخبيثه والسيئه والحاقده والشعب صابر وأمله في الله اعظم وأكبر وغداً لناظره قريب وسوف تدور الدوائر. ؟؟؟.
المك/داؤد أبوكلام داؤد. مدير مركز عيون التلال الاعلامي٢٣ مايو ٢٠٢٤
