زاوية خضراء .. بقلم داؤد ابوكلام داؤد : موسيقي عِدة رمضان

وأنا داخل غرفتي أتابع في الأخبار أتنقل بين القنوات والراديوا ومره أرجع للواتساب وتاني أمشي الفيس والمسنجر ولدي دخل لقاني شغال جاي.. وجاي.. وجاي.. قال لي يا أبوي (صاحب بالين كضاب ). هسي تتابع ديل كلهم كيف.!!؟؟ قلت له (صاحب مرتين ذاتوا كضاب ). يا زول أمشي شوف شغلك دي غرفتك ولا غرفتي؟؟ إنشاء الله (اتقلب هوبا وانطط ذاتوا) . شويه كده سامع ليك في الزقاق بوره إزعاج شديد كج ..كج..كج..شوووو .كررووو. تش..تش. يابت الإزعاج ده شنو كرهتونا يا أخي.!! بتي قالت لي يا أبوي (دي سيمفونية العدة ) وقنبت تضحك.. قلت لها ياسلااااام علي موسيقي العدة. ؟؟. وجريت نفس طويل وقلت مشي أمرك يا قدر. اولاً الشكر كل الشكر لكل النساء في عموم السودان في الحضر والريف والنازحين وخارج السودان في المهجر لدورهن الكبير في أيام وليالي رمضان من تحضير للإحتياجات من قبل رمضان ناس شرموط وبصل وبهارات وأبري وهلم جرا. ثم تحضير صينية الفطور وغسيل العدة وتحضير العشاء ومن ثم تحضير السحور وتاني في الصباح تعال شوف فوضي الأطفال والمرضي وحاجاتهم من شاي وفطور. تعب ذي التعب. شايف رجال دولة تونس الخضراء يعزون المرأة عز ذي العز (هدايا من ذهب يسمونها شنو كده حق الملح ) مش ذي ناس فلان الزهجان ديل الواحد صوتوا ذي النقارة ههههه. المهم نحن في السودان ولظروف الحرب والفلس نطلب من رجال السودان كل واحد منا (يطبع قبلة ) في جبين زوجته وبنته وامه واخته وحبوبته ويقول لهم ( خالص شكري وحبي من قلبي) . ويمشي بوره بهناك ويمسك يد زوجتة ويبوسها في (بطن وكف يدها خليك من رائحة البصل ويقول لها ما أجملك واحلاك واحلي طعامك) . بس اعمل حسابك اوع امك تشوف. ههههه. عموما دي خواطري حول شهر رمضان وعدة وأواني رمضان وطبعاً كلنا شفنا بنات السودان منذ الصغر يلعبن عدة.. عدة وهناك بعض القبائل في السودان تهتم البنت عندهم بشراء العدة منذ الصغر حتي تجهز لنفسها عدة الزوج من الملعقة حتي السرير والدولاب.(طبعا هناك بعض الرجال يحبون ويعشقون صاحبة العدة ). وتعلمون وترون بأم أعينكم تكدس منازلنا بالعدة وربما بعض منها في (الحافلات والدواليب ) مرصوصه لم تستعمل منذ شرائها. والويل كل الويل لك أن تكسر كبايه أو تضيع ملعقه (بره في الضره). شي علامات وبهيات و منكير علامات الحرص من الضياع. المهم نحن لا نملك إلا أن نقول شكراً لكل النساء ونساء العالم الإسلامي عموما لما يقدمهن من مجهود في رمضان عشان كده نرجوا من الرجال الاشاوس العندوا شنب والماعندوا شنب تقديم كل الشكر والحب والمودة والثناء لكل الجميلات الحلوات الحنونات الطيبات الوسيمات ويقولوا لهن لكم حبنا.نحبكم. نحبكم..نحبكم. لا تبخلوا لهم أيها البخلاء (بكلمة بحبك). فيا كل النساء في المنازل عيد سعيد وجديد وشديد وفريد…أيها الرجال لو ما عندكم ذهب ذي رجال تونس الخضراء. قدموا لهن ولو(خاتم فضه وبالعدم قبلة في الجبين ). وتاني أديها قبلة سريه في يدها الطاهرة بعيداً من أمك والأطفال وجواسيس المنزل الكتار ديييل. ؟؟؟ واقترح للنساء في رمضان الجاي رفقاً بهن القوارير أن يكون كل يوم نوع واحد من العصير في جردل او جك وصحن عصيدة وبلح وبليلة والباقي خلو بعد صلاة التراويح وكل عام وكامل شكرنا وتقديرنا وحبنا لنساء السودان السمراويات الجميلات كرج.كرج تش تش كوووو سيمفونية العدة والأواني في رمضان كل التهاني والأماني لكل الناس الما لاقيناهم في العيد السعيد.

المك/ داؤد ابوكلام داؤد. ١٢ أبريل ٢٠٢٤ ثالت أيام العيد